Argitalpen data: 2024ko martxoaren 5a
Bilbo, 2024ko abenduaren 19a – Basque Hydrogen enpresak finantziazio handia lortu du Project finance eskema baten bidez. Hori oso urrats garrantzitsua da gure gizartearentzat; izan ere, trantsizio energetikorako funtsezkoak dira horrelako ekimenak finantzatzea.
Basque Hydrogen ekinaldia aitzindaria da energiaren sektorean, eta Petronorrek, Energiaren Euskal Erakundeak eta Enagás Renovablek bultzatu dute. Ekimen horren helburua da hidrogeno berdearen ekoizpena sustatzea, Bilboko portuan garatzen ari den 10 MW-eko potentzia izango duen elektrolisi-proiektu baten bidez.
Energia berriztagarria erabiliz hidrogeno berdea ekoizteko planta bat eraikiko da; zehazki, eguzki eta haize energiaz elikatutako uraren elektrolisiaren bidez. Urtean 1.600 tona hidrogeno berde ekoizteko ahalmena izatea espero da, eta hori industria-sektorean zein mugikortasun jasangarrian erabiliko da, sektore horiek deskarbonizatzen laguntzeko.
Finantziazioa Project Finance eredu baten bidez egituratu da. Eredu edo bide hori eskala handiko proiektuetarako erabiltzen da, eta proiektuaren etorkizuneko diru-sarrerak zorra bermatzeko eta hasierako inbertsioa finantzatzeko erabiltzen dira. Eskema horri esker, finantzatzaileen eta garatzaileen artean partekatu dute proiektuaren arriskua, eta bi bankuren parte-hartzearekin egituratu da: BBVA da operazioaren buru, eta Kutxabank.
Project Finance bidez finantzatzea funtsezko tresna izan da hidrogeno berdearen proiektu handinahi hau bideragarria izan dadin, eta, aldi berean, finantza-egitura sendoa ematen du, energia-teknologia berrietan egiten diren inbertsioei lotutako arriskuak minimizatzen dituena.
Horrelako finantza-formulen bitartez, berrikuntza eta hazkundea sustatzen ari dira energia-sektorean, kasu honetan hidrogeno berdearentzat bezala, zeina funtsezko osagai gisa gailentzen eta posizionatzen ari baita Europako energia-estrategian datozen urteetarako.
Basque Hydrogen Eusko Jaurlaritzaren (INDARTU ekimenaren bidez) eta IDAEk kudeatzen duen PERTE ERHA programaren laguntzak jaso ditu. Era berean, teknologia garbiak eta deskarbonizazio-helburuak sustatzeko Bizkaiko lurraldean aurreikusitako zerga-politiken araberako zerga-pizgarriak lortuko dituela aurreikusten da.
Aurreikuspenen arabera, 2026. urtearen erdialdean hasiko da instalazioa hidrogeno berdea ekoizten, eta horrek energia garbiko iturri hori lehenbailehen erabiltzea erraztuko luke. Izan ere, funtsezkoa da erregai fosilekiko mendekotasuna murrizteko eta klima-helburu globalak betetzeko.